Ask Mih To Dance Nah
Ah went to de party by miself
ah see a handsome fella watching mih,
like he can't take he eyes off mih,
but ah here standing in de corner
like if ah is wallpaper.
Ask mih to dance nah!
As ah listen to de
sweet music of de steel band
Great music of yesteryear
de songs ah love to hear.
Ask mih to dance nah!
While ah watch others sway
dey hips from side to side
tapping dey feet
to de melodious beat.
Ask mih to dance nah!
As ah long to be in yuh arms
feeling de warmth of yuh body
If only for one song
an ah hoping that it go be long.
Ask mih to dance nah?
Den ah will lean mih head on yuh
and ah will close mih eyes
and we wouldn't even think about
nobody around us.
Ask mih to dance nah
and ah will move with yuh
ah will groove with yuh
ah will follow your lead
as we mould together as one.
Ask mih to dance,
and mih answer will be
Yes, definitely yes!
|